Kembang Api
oleh Prayoga Adiwisastra*
lagu tungtung taun geus tilem lebah gumuruh pésta
sésa aweuhanana teu kungsi parat kana lelembutan
kalah ngadadak ngulahék dina bencarna botol demi botol
dina ragotna rangkulan jeung ciuman nu mabok birahi
lebah mumunggang langit, pirang-pirang kembang api
bet mirupa isarah kakeueung geusan nyorang gurat balébat
kawas saabringan silalatu nu rabul tina durukan jajantung
ngarérab waruga jadi sakeureut raheut jeung sabuku tatu
pucuk-pucuk waktu geus renung dina rahim peuting
rerencepan ngeteyep metikan lagu subuh jeung ibun
tuluy tumuwuh ngajulan lanskap langit nu diwangun
tina renghat wangunan taun jeung bugang-bugang abad
bari mekel saranggeum karémpan, léngkah terus nyusud
kelemeng srangéngé nu boa geus jadi lebu jeung silalatu
talajak naon deui nu kudu dipilampah mun témbok-témbok
tur tihang-tihang waktu geus runtuh ngaruruban buligirna diri
*Prayoga Adiwisastra, Mahasiswa S1 Jurusan Pendidikan Bahasa Daerah, UPI Bandung. Tulisannya tersiar di media massa.